"Na chawva umnak ah, na thinlung zong a um ve lai." Hihi Jesuh cawnpiakmi bia a si. A dik tuk timi minung tampi nih an ton theu lai. Hihi Matthew 6:21; Lk.12:34 ah kan hmuhmi a si. Nang na ca zongah a dik ve ko lai. Hihi ka caah zong ah a dik tuk ve.
Naite March 14-16, 2020 karlak ah, Columbus Junction City ah ka va tlawng. MACCF Conference le Leadership Training an ngei i, cuka ahcun caan an ka pek ve i, ka va kal ve. Columbus Junction cu Laimi Khrihfa hna kan pa, Rev. Arthur Carson khua a si, ka phak khawh caah ka lunghmuih taktak ko. Kaa lawmhnak hi, hmurka in ka chim kho lo.
Columbus Junction ka hmuh caah, kaa lawmh lawng siloin ka thinlung tein hmuh ka duh taktakmi "Littleton Brothers Monument" (Littleton Lungphun) ka va hmuh caah, ka lung aa lawm khun. Hi kong te hi, ka blog ah ah ka tial bal cang. Tuanbia cu hi tin a si.
Voikhat cu Columbus Wesland Library ah ka fale he cauk kan hlang. Makazine pakhat ka rel. Catlap pakhat te ah ca an tialmi nih ka thinlung a ka sukhai ngai. Ca an tialmi cu, "Civil war lio ah, Iowa khua i khuate pakhat ah, minung unau 6 cu Union ralkap ah an tla ve i, an unau rual in raltuknak ah an thi dih, a nungmi pakhat hmanh an um lo.
Cu hna unau kong cu, mi pakhat nih 1907 ah Columbus Junction ah capar pakhat ah a rak tial. Cu catlap hlunmi te cu Tom Woodruff timi pa kha North Carolina ah an rak pek. Cu hnu ceu in, hi hna unau rual ram le miphun caah a thimi hna kong hi, an van thei than. Hi unau hna nih hin, ral an tu ko nain USA hi aa thleng timi an rak hmu manh lo. Cucaah hi hna hi thih sawh in an thih awk a si lo. An lung kan phun hna lai. ''Hlut a duhmi paoh nih van hlu u,'' timi ca an tial.
An tuanbia ka ruah ah ka lungthin a ka sukhai ngai. Miphun caah unau paruk ning bak in nunnak pek cu a fawi lo. Uar tuk dingmi an si. Cucaah $10.00 te ka rak hlut ve. Check te ka hei kuat hna. Lung cu an donh i, an lim. Dollar fang 10 te ka kuatmi ruang te ahcun, "Lungphun kan lim cang le cu ni, cu caan ahcun lungphun onnak kan ngei lai I rak ra ve law" tiah hmantlak aa telmi postcard an rak ka kuat.
Mirang miphun an rak fel ning hi, tluk awk an tha lo. Dollar 10 ka hlutmi cu, lungphun onni ah an tel ve ding in sawm an ka philh lo. Khuaruahhar a si. Kal ka duh nain suimilam 10 leng motor mawngh a hauh caah ka rak kal kho lo.
Asinain, cu lungdonh te u, ka thinlung ah a um peng. Ka philh kho lo. Ka nun chungah ka hmu kho te hnga maw tiah ka ruat tawn. Hmuh ka duh ngaingai tawn nain, ka hmu kho bal lo.
MACCF Conference in tlun ka timh ni ah, Columbus Junction Library ah kan lut pah. Librarian nu he bia kan i ruah i, "Littleton Brothers Monument" i tangka ka hlutnak, an ka sawmnak le hmuh ka duhnak kong cu ka ruah."
Librarian nu nih, "A naite. Na tlun pahnak ding lam ah a si ko. Pial khawh pah a si" tiah a ti. Cun hawi nih an ka kalpi. Har ngai in GPS hmang in kan kawl i, kan va hmuh. Toolsboro timi khua fate kam ah a rak um.
Hman kan i thla. Caan tawite lawng kan um i, minute 10 hrawng kan um hnuah, kan kir colh. Hmuh ka duh tukmi lungphun ka hmuh caah, ka lung a tling ngaingai. Ka lung aa lawm Ka lunghmuih. Um ka cim lo nain, tlun ka hauh caah caah sau kan um kho lo. Lungleng ngai in kan kir than.
Kan kir pah ah, Jesuh bia ka lung chungah a hung chuak. "Nan chawva umnak ah nan thinlung a um ve" timi kha Dollar fang 10 te ka hlutmi ruangah pei Littleton Brothers Monument ah ka thinlung a rak um peng hi, timi ka fiang.
Vancung ah chaw kan khawn ahcun vancungram ah kan thinlung a um kho. Vawlei lawngte ah chaw kan khawn ahcun vawlei ah kan thinlung a um. Vawlei kan tlaihchan, Cucaah Jesuh nih "vawlei hi tlaihchan hlah u" a kan ti. Zeicatiah a hmunmi a si lo caah a si.
Littleton Lungphun cu a fek taktakmi lung in an ser. Fawi le bai ah a rawk kho ding a si lo. Asinain ni le caan kum tampi a kal tik ahcun a rawk ve te ko lai. Ka pekmi $10 zong cu Lungphun aa rawk cun a lo ve te ding a si. Khua ka ruat. Ka duh tukmi le ka uar tukmi a si caah, $10 te hi hi lungphun caah ka pek ve. Ka chawva $10 hi hi lungphun ah ka khawn ve. Asinain a caan a phak cun a rawk ve dingmi lungphun a si timi ka fiang.
Kan tin pah ahcun ka nunnak ah sermon pakhat a ra. "$10 te na hlutmi Littleton Lungphun te hmanh ah na thinlung biatak tein a um a si ahcun, dollar a let tampi na hlutnak le na khawnnak vancung na chawva umnak ah teh na thinlung a um ve maw?" timi bia a ra.
Cun fiannak pakhat ka thinlung ah a chuak. "Littleton Brothers Monument caah, hnek chawm si lo tein, siang tein, mah lungtho tein na pek i, rungrul le cirik nih an ei khawhlomi vancung ah khin chaw na khawn tik ah, hnek chawm in na khawng sual maw? Siang setsailo in na pe sual maw? Mah lungtho te silo in mi dang nih an pek ve, mi hmai khah a si lo timi sawhsawh hna in na pe sual maw?" timi ka thinlung ah a ra.
Littleton Brothers Monument ka va hmuh caah, ka thinlung aa lawmh lawng siloin Jesuh cawnpiakmi "Na chawva umnak ah na thinlung zong a um ve lai" timi sermon tha tuk zong ka nunnak ah a ka fianter caah, lunglawmhnak in ka khat.
Careltu nangteh, "Pathian caah na pekmi chawva umnak ah na thinlung a um kho maw? Pathian ca na pekmi na chawva-Thawhlawm, biakinn ca, cheuhra cheukhat, missions ca- na pek tikah na chawva umnak ah na thinlung a um ve maw? Na chawva umnak ah na thinlung um lo in pek sawhsawh in na pe sual maw?"
Hihi ruah a hau. "Kan chawva umnak ah kan thinlung a um lo ahcun, kan pekmi a lakka a si sual lai maw?"
---------------------------------------
Comments